 |
||||||
|
第六場 查 名
( 皇宮中的花園，在灌木叢中有座假石山。不遠處有一座精致的樓閣。那是圖蘭多的寢宮。)
( 夜晚，一切皆靜。只有傳令官宣讀皇家命令的聲音在響。)
( 隱名王子臥在台階上。他聽著宮內的傳令聲。)
傳令官：( 用飽滿的聲音， 白 ) 我宣佈圖蘭多公主既命令： 今晚邊個都唔准睡覺，人人都要清醒！
眾人：( 在後台齊聲應和著，呼叫。) 邊個都唔准睡覺，人人都要清醒！
傳令官：( 較遠地，白 ) 黎明之前，一定要查清果個外鄉人既姓名， 違者處死！
眾人：( 在後台齊呼 ) 違者處死，違者處死！
傳令官：( 在後台更遠地，白 ) 今晚邊個都唔准睡覺，人人都要清醒！
眾人：(在後台遠處，白 ) 邊個都唔准睡覺，人人都要清醒！
隱名王子：( 望望宮內，側耳聽那些叫聲。) ( 二王首板 ) 圖蘭多，悄悄靜， 宮樓在醒，公主呀也醒。 (二王 ) 臨出閣，才查夫婿名， 亂你方寸休怪我不情。 水自空去，花自飄零， 愁對殘花賸水，怕睇香閨冷清。 量你風流蕩院庭， 夜夜獨眠衾帳會誤了卿卿。 我地春宵弄影， ( 滾花 ) 鴛侶春宵， 夫婦情。 ( 南音 ) 你今晚想清醒， 最好走去數星星。 星星為左你，霎眼睛。 星星為愛，就想天快明。 我愛火燃燒你，你呢個霜冰。 果陣你會抖顫，會歡笑不停。 你變得嬌羞，係個好淑女，溫柔多情。 ( 白 )圖蘭多，我既未婚妻呀，你真忍心， ( 流水南音 ) 逼我獨在門庭望風景， 公主驕橫無理要人醒。 你獨抱香衾，不盼天明， 我盼日照桃花徑。 最好你在我懷中閉眼睛， 唔好再假惺惺。 ( 乙反中板 ) 我在盼玉影，只見朱帘掩映， 月兒一縷弄倩影， 燭光熠熠火不停。 望嬌為情所役，假意查姓查名。 喜聽遠處傳來聲聲雞鳴。 ( 宮內傳雞叫聲，隱名王子作驚狀 ) 天將明，三更雞鳴， 我首級猶在唔驚！ 盼天曉，望天快明。 ( 二王 ) 籌碼係我呢條命， 皇宮喋喋要查名， 我望公主能轉性。 ( 滾花 ) 唔再念那殺人經， 多添溫柔兒女情。
( 後台有侍女走動。)
侍女：( 白 ) 我地唔知道佢既姓名，邊個知道就快些講明， 免得我地受苦刑。
隱名王子：( 興奮地站立，雙手舉向天。) ( 白 ) 消失吧，黑夜！落去吧，星星！勝利就在天明，在天明！
( 三大臣走近隱名王子。)
平：( 雙星恨 ) 快垂下你既眼睛，天還黑黝黝。 趕快低首，我命操你既手， 求你快說出姓名，免我成骷髏！
( 隱名王子故作不解狀。)
潘：( 接唱 ) 公主下令，我地就發愁。 查你姓名我心好憂。 佢講查唔到，就將我地幾條老命收。 死神敲打各家門樓。 百家姓中只有你既姓唔准漏。 你既姓同我地結左仇。 最好你唔再逗留！趕快走！
隱名王子：( 白 ) 你地究竟想要我做乜野?
彭：( 接唱 ) 唔好企處逗留，講左姓名就快走。 女人到處有，又何必你再發愁。 要肥抑或瘦？ 我找肥瘦一打由你點收。 ( 白 ) 肥瘦一打交你手， 保你銷魂到漏油， 還怕你冇精力消受。
( 潘向士兵招手，推出一群半祼少女在隱名王子面前。隱名王子不理睬。平揮手示意抬來裝滿金銀珠寶的箱子。)
( 彭揮手叫少女們退下。)
平：( 接唱 ) 你唔要美女就要金鉤。 這一雙鴦鴛扣， 閃光光亮晶晶，全屋金透。 黃燦燦一片光釉。 水晶鑽石紅玉，夠用幾個年頭。 金銀珠寶全俾你收。 我勸你拿了趕快走。
隱名王子：( 白 ) 不，財富全無用！
彭：( 接唱 ) 我睇見這些都口水流，佢居然高鬥唔收。 還有乜野油水，我地有冇想漏。 想衣錦還鄉， 獨占鰲頭？
平：( 接唱 ) 你想功名又要刻鏤， 我把你名字鏤在牌坊頭。 贊你功高像周文王，你德重如諸葛武侯， 威名震九州。 ( 白 ) 你講想要乜野，我都供必應求。
潘：( 白 ) 你快講出你姓什名誰，你唔講公主就發嬲。 ( 接唱 ) 果陣就鬼見愁， 佢會叫劊子手， 用燒紅鉗子卡你既喉。
隱名王子：( 接唱 ) 我唔會走！ 雞鳴報曉時，我到鳳池頭。 我做左駙馬爺，會俾各位報酬。 無謂你地查得咁辛勞， 我姓名響宇宙。 ( 白 )中國有句古話，曾記否?各家自掃門前雪，休管他人瓦上霜！我勸你地唔好再查我姓名， 趕快走。
平：( 白 ) 乜話，我地叫你走，你反轉頭叫我地走。
潘：( 白 ) 氣死我，氣死我地呢三個老頭。
隱名王子：( 白 ) 美女，黃金，功名，我唔會收。威逼、恫嚇， 我唔低頭。我要娶圖蘭多！我唔會走。你地勸得圖蘭多嫁我，你地就得報酬！美女、金鉤，任你地收！你地最好留長條命來享受。
潘：( 兇狠地拔匕首向著隱名王子，白 ) 辦唔到！唔等得你成功， 我先要你條命。要左你條命，我地先至有活命。你知道， 查唔到你姓名，我地也冇命。你快講，講出你既姓名！
眾人：( 沖向隱名王子 ) 快講！免得我地全都因你受苦刑！
平：( 憂慮地， 白 ) 你知道， 果個殘酷既公主，乜事都做得出。 佢會叫劊子手用刀子捅、用釘子釘， 要你既命。
( 隱名王子仰望天。雞又叫三遍。眾人惊恐。隱名王子高興地笑。)
隱名王子：( 激動地， 白 )天快明！呢個就係我既天命！
眾人：( 拔匕首向著隱名王子 ) 唔等天明，我地先要你既命！ 除非你說出你既姓名！
( 後台的士兵邊走邊叫。)
士兵：( 白 ) 佢既姓名係呢度。
眾人：( 轉向士兵，白 ) 姓名，姓名！
( 幾個士兵把柳兒和鐵木爾帶上。他們傷痕累累，顯得十分衰弱，隱名王子痛苦地望著他們。)
隱名王子：( 沖向前叫喊 ) 佢地點知道我既姓名?
平：( 趨前看看鐵木爾和柳兒，白) 呢個老坑和女仔，果日同你在一起。
隱名王子：( 憤怒地，白 ) 放佢地走！
平：( 狡詐地，白 )唔放。除非你自己講出黎。佢地知道你既秘密。 ( 轉向士兵，白 )邊處捉到佢地?
士兵：( 白 ) 佢地在城墻邊睡覺。
三大臣，眾人：( 撲向樓閣，齊呼。)公主，出黎呀！
(一道金光， 照著樓閣前的圖蘭多。人們拜倒。平行禮畢， 神色莊重地走向她。 )
平：( 白 ) 公主殿下，呢兩個人知道果個外鄉人既名字。佢地唔講， 我地有辦法。有鑿，鑿開佢既牙。有鉗，鉗出果個名字。
圖蘭多：( 對隱名王子，傲慢地諷刺地，白 ) 睇你既臉色好蒼白。
隱名王子：( 高傲地，白 ) 唔係我害怕，而係你害怕。 你睇到我臉上有晨曦。
圖蘭多：( 矜持地，白 ) 呢兩個人你識唔識？
隱名王子：( 白 ) 我全都唔識！
圖蘭多：( 挑釁地，白 ) 你等住黎。老坑，快講，你要回答我。 ( 抓住鐵木爾的衣襟。指著隱名王子，白 ) 佢係邊個？
鐵木爾：( 踉踉蹌蹌，勉強站穩，白 ) 唔知道！
( 圖蘭多正用力推開鐵木爾，柳兒趕忙上前扶他。)
柳兒：( 白 ) 佢既姓名，只有我先至知道。
眾人：( 白 ) 唉！我地都有救啦！
隱名王子：( 又擔心又裝作不認識，白 ) 你知道乜野呀？奴婢！
柳兒：( 向隱名王子，白 ) 只有我知道。我最高既心願， 就係要把呢個秘密鎖在我心中！
潘：( 沖向柳兒，白 ) 綁起佢，嚴刑拷打佢！話俾你知， 你唔講我就將你處死！
隱名王子：( 走到柳兒面前，用身護她，憤怒地向著潘，白 ) 你要賠佢既眼淚，你要賠佢既冤屈！
圖蘭多：( 狂怒地對士兵，指著隱名王子，白)捉住佢！
( 一士兵給隱名王子上了手銬。圖蘭多冷笑著望著隱名王子。)
柳兒：( 面對隱名王子，白 ) 我唔會講實話！
( 柳兒被士兵按下跪。)
平：( 大聲地，白 ) 那名字？
柳兒：( 白 ) 唔知道！
平：( 憤怒地，白 ) 你唔係講過你知道既咩？
柳兒：( 堅決地，白 ) 係！不過，我唔會講俾你聽。 ( 一士兵扭她的手。) ( 臉色慘白， 痛苦地叫喊 ) 哎喲！好痛• • • • • •
鐵木爾：( 哀傷地，白 ) 天啦！佢在痛苦地呼叫！
隱名王子：( 怒沖沖地，大叫 ) 放開佢！
柳兒：( 哀傷地面向隱名王子，白 ) 王子，不，不！我冇叫喊！ 佢地冇碰我，冇人• • • • • • ( 喘氣，艱難地，白 ) 冇人碰我。( 轉向士兵，憤怒地，低語 ) 野蠻人！我會將嘴緊閉，唔再叫喊！ ( 虛弱地望天長嘆 ) 唉！我再難支持• • • • • •
三大臣，眾士兵：( 齊喝 ) 快講！快講！
圖蘭多：( 白 ) 把佢鬆開，讓佢講！
( 眾士兵鬆開柳兒 )
柳兒：( 神色凜然， 堅決地，白 ) 我寧願死！
圖蘭多：( 緊蹙眉頭， 困惑地，白 )係乜野將你既心變得咁硬?
柳兒：( 望著隱名王子，深情地，白 ) 非凡既公主，係愛情！
圖蘭多：( 疑惑地，白 )愛情?
柳兒：( 抬起充滿柔情的眼睛，唱蕉窗夜雨 ) 係愛， 係我隱蔽既愛情。 想當初，月照宮庭， 入夜宮闈皆靜， 風不定人初靜， 雲破月來花弄影。 臨窗晚風吹醒。 我在花園，傷流景。 我掃落花，紅滿徑。 我嘆花開時，好光景； 花落好飄零。 ( 白 )紅顏薄命，如花命。一世好孤清。公主，我同你都係女兒身，你艷過桃花，玉潔冰清。但你想過未?昨日花開已老，今日花開看好，呢個係常情。鏡裡鬢毛斑，奈誰何? 公主，唔好老來孤零。
公主：( 似有所觸，但隨後又裝矜持，白) 講下去！
柳兒：( 續唱 ) 我在掃花徑，忽見一身影。 佢講一兩聲，笑出臉有情。 ( 柔情地白 ) 佢就係我朝思暮想既小主人，好瀟灑既王子，佢講： ( 續唱 ) 雨停風方定，滿園晚露鬥草贏。 何不待天明，才掃落花亭。 莫負辛勞，明日落紅，仍滿徑。 你要惜花薄命！ ( 深情地，白 ) 公主呀，我地呢個王子，不但個樣靚，人聰明，心地又好叻！ ( 續唱)自果晚見左佢， 常夢見佢既身影， 我心中就生愛情。 我出身微寒，但我情未罄！ ( 溫柔地，白 ) 公主呀，你知唔知道愛情多美好，多令人陶醉，令人醉不醒。愛情係人既第二生命！ ( 續唱 ) 我無法得到佢愛情， 我好痛苦終日不得安寧。 我既心事，只向佢表明。 我唔講佢姓名，佢才得你既愛情。 ( 絕望地呼叫 ) 公主呀，可憐我，一世單思，一世孤清。 ( 續唱 ) 我將失去，一切既憧憬; 我將會失去，我寶貴既生命。 保沉默唯有死， 你唔知佢姓名， 咁佢才得到你既愛情。 只有佢幸福樂盈盈， 我柳兒呀，雖死亦會雙目瞑。 一片丹心，愛情亦表明。 以死表堅貞，我對愛追求，至死不停！
平：( 堅決地，白 ) 公主， 快給我動大刑！
圖蘭多：( 狂暴地，白 ) 唔准你死，我要逼你講出果個秘密！
平：( 粗暴地，白 ) 快講出佢既姓名！
隱名王子：( 極力掙扎，大叫) 畜牲！唔准傷害佢。放開佢！
( 東方漸白。眾人驚恐地望著天。柳兒望望天，再望著隱名王子凄然一笑。隱名王子迎著柳兒苦笑。)
潘：( 瘋狂地，大叫 ) 殺死佢！殺死佢！
平：( 急躁地，大叫 ) 不！留下佢呢個舌頭，唔准佢死。快動大刑！
潘：( 狂叫 ) 用夾棍夾！上老虎凳！
眾人：( 在騷動，在呼喊 ) 快講！快講佢既姓名！
( 幾個劊子手持刀上場。)
柳兒：( 白頭吟 ) 嘆剩粉脂零， 我似落絮飄花伴殘青。 我睇那鬼穴好靜， 黃泉一路孤清清。 ( 衰竭地，白 ) 唉！我力盡精疲。公主， 放開我！求你大慈大悲！ ( 續唱 )花月不留痕，花魂早入土定。 我就像那滿徑落花葬幽嶺。 我柳兒呀，因爹娘長眠不醒， 賣入宮廷好凄清孤仃， 像那花落飄零。 爹娘呀！快快和我相迎！ 我共你地臥山幽嶺，一家團聚不離影。 在地府，一家相呼應。 我在陰曹地府，才搵到我家庭！ 死後既柳兒呵， 不再孤苦伶仃！
三大臣：( 齊聲喝令 ) 快講！快講！
柳兒：( 虛弱地、似有所悟地， 白 ) 係，我係要快講。 在我臨死前，我係要講清。公主呀！妳• • • • • • ( 梨花慘淡經風雨 ) 你千金之軀， 卻裹層冰晶。 王子既愛火，會熔化那霜冰。 那蒼天就會萬里晴， 你會懂得愛情，更加溫柔娉婷。 年少不惜春，一世好孤清。 大好樓庭，與郎舞雙影， 就係人間仙境！ ( 誠摯地白 ) 公主呀，榮華怎比得夫妻情，富貴怎比得夫妻雙棲雙宿醉不醒！呢種女兒經，早應誦入你心靈。 ( 深情地望天，白 ) 啊，快退下，星星！我盼望天明！快來吧，黎明！天明，王子就得個駙馬名。佢會成功，而我卻魂歸荒嶺！無法看到佢既笑容！啊！王子，黃泉路我獨自飄零。為左愛，為左你難忘既笑容，永別了• • • • • • 愛• • • • • • 情• • • • • •
( 柳兒深情地向隱名王子行了個半跪禮。突然轉向身旁一士兵，從他手裡奪過一短劍，猛刺自己。她轉過臉去，那垂死的眼睛看著隱名王子，低聲地，斷斷續續地呼喚：王• • • • •子，笑• • • • • • 容，笑• • • • • • ”，踉踉蹌蹌地向他走去，在他面前倒下。)
眾人：( 騷亂，眾說紛紜 ) 快講，快講佢既姓名！ 叫佢點樣講呀？ 死人唔會講姓名！ 嗄！死左?年輕輕的，就冇命！ 呢個年頭，最唔值錢係人命！ 一個為愛而死，一個卻要愛自己既人去死，同係女人，為乜有些就咁多情，有些就咁無情。
( 圖蘭多聽著人們議論，臉在抽搐著。鐵木爾絕望地舉手向天，喃喃喚著：“ 柳兒”。 三大臣惊恐地呆立。)
隱名王子：( 撲向柳兒，悲傷地哭喚 ) 啊！天哪！啊！柳兒呀！ 你為乜野唔早些講明？你死左我先至知道你既心。你為我而死！你為愛我而死！我可憐既柳兒呀！
( 一陣沉寂。圖蘭多呆呆地看著柳兒的屍體。突然，她臉色蒼白， 憤怒地從身旁士兵手中奪過一條鞭子，鞭打那個被柳兒奪去短劍的士兵。平上前勸解。)
平：( 奪過鞭子， 殷勤地白 ) 公主，息怒。打這奴才， 不必玷污你呢雙玉手。 ( 向著被打的士兵，喝道 ) 還不快滾！
( 士兵慌忙向公主行了個禮，下。)
平：( 狡猾地向著公主，指指隱名王子手上的銬鐐，白 )公主！
( 圖蘭多略有所動地看了隱名王子一眼，兩人視線相投。她被他那充滿怨恨卻又滿懷柔情的目光所動，趕忙掉轉頭。向平作了一個手勢。平望望公主，又望望彭和潘，三大臣會意地上前，一齊松開隱名王子的銬鐐。鐵木爾踉蹌地跑到柳兒屍前，跪在她身邊。)
鐵木爾：( 悲泣著，白 ) 起來，柳兒，起來！而今已經天明。 天亮啦！小柳，睜開眼，小柳，我既小柳！
( 圖蘭多臉上神色頹喪痛苦。平留心地看了她一眼，便粗暴地走向鐵木爾。但當他走近柳兒屍體時，聲調馬上變得柔和。)
平：( 白 ) 起來吧，老人家，佢死左啦！
鐵木爾：( 悲愴地撲向柳兒，大聲呼喚 ) 安息吧！深情的柳兒！ ( 此時燈光全照柳兒屍，台上一片慘白，一片死靜。) ( 哭)喇啊• • • • • • 喇啊• • • • • • 喇啊• • • • • • 啊啊• • • • • • 啊。唉！罷了我既柳兒呀！ ( 拉長腔 )唉！天哪！ ( 乙反南音 ) 全城在醒，惟佢長眠。照佢獨眠， 求求天上月。 憶往昔歲月，互相共持扶，戰亂中沉冤浴血，奔走風和雪。 你和我奔走風和雪， 逃避奸人擄掠。 你含辛茹苦，你既品行情操，無人能超越。 你升天堂，你唔好身陷地穴。 ( 二王 ) 你那聲聲咽，係千古唱絕。 嘆你玉殞香消！唉，我恨那風腥雨血！ 恨公主恃強凌弱，逼我地從此永訣。 嘆暮天涼月，唉，不圓而缺！
隱名王子：( 哀傷地，唱反線中板 ) 嘆一句弱女，含恨長眠荒穴。 你雖是出身微劣，但心卻純潔如雪。 還未嘗風花雪月， 卻早灑一腔熱血。 你至死沉默無語，係要我心悅。 ( 二王 ) 唉，論功行賞， 你應封侯封爵， 我和你唔能成鴛侶，你情在我心永不絕！ ( 二王滾花 ) 你沉冤！血灑在那葬花穴， 一腔熱血映紅那花中月！
鐵木爾：( 呼天搶地地，白 ) 柳兒呀！雲破月來你好報怨。 枉死既鬼魂不會甘心沉冤。那殺人罪魁要入地穴。( 憤怒地向著公主，大臣，士兵等，叫嚷 ) 可怕既罪過！你地要受到報應！那冤死既鬼魂會伸冤！
( 圖蘭多臉有悔意，身體微抖。兩個侍女用面紗替她蒙臉並攙扶她。人們紛紛跪下向天禱告。)
眾人：( 向著柳兒屍，齊呼喚 ) 深情既柳兒，安息吧！悲傷既鬼魂，唔好懲罰我地！
( 台後合唱： “安息吧！深情的柳兒• • • • • • • ”•) ( 註：作曲家普契尼作曲到此時，命終。)
鐵木爾：( 江河水 ) 嘆地恨天愁， 你一去不回頭！我老淚濕青衫袖。 你魂歸故樓，深情既柳兒呀，你為愛斷了頭。 忍心捨我而走我傷心透！ ( 氣氛變得凝重，人們抬起柳兒屍體。) ( 悲愴地向著柳兒屍體，作灑酒狀，續唱 ) 空捧祭酒，誠心，灑向你靈頭。 ( 踉踉蹌蹌地走近柳兒屍體，把她的手抓在自己手中。續唱 ) 我上前捉住你手， 伴你走向滿佈墳塚既荒丘。 日夜陪你無盡頭。 在荒嶺裡奔走， 手拉手把人間苦辣辛酸嘗透！
平：( 帶著深深的憐憫，接唱 ) 佢句句刺我心，我冷汗濕了白頭。 我見人死從來眉唔皺。今日我卻心憂。 良心被折磨像上了鉤，可知否？
彭：( 接唱 ) 呢個弱女苦難壓我心，舊恨說不休，又添新愁。 冤債各有主，你追究我我就發抖！
潘：( 接唱 ) 你寬宏大量， 唔好將我揍。 合埋雙眼一路好走！
( 人們抬著柳兒屍體，迎著一縷曙光走向後台。)
平：( 白 ) 皇令出自金口，我地只有執籌，唔敢拗口， 請你原諒唔好追究！
眾人：( 邊退下邊呼叫 ) 柳兒，善良既柳兒，安息吧！
( 人們全離去， 台上只有圖蘭多和隱名王子。圖蘭多僵硬冷峻。)
隱名王子：( 激昂且又憂傷地，唱紅燭淚 ) 雲破月缺人己靜， 幽魂寂寞荒丘嶺。 孤魂飄飄多淒清， 剩下身後百日情。 以死殉情更多情。 只餘下我獨飄零。 嘆一句芳魂有靈， 罵一句公主無性。 曲盡星河稀， 悲歌唱幽暝。 查姓名卻枉送了卿卿。 我應聽勸離開渡西嶺， 咁你就唔會枉送性命！ ( 忽轉身見到圖蘭多，生氣地，唱水流紅 ) 你無人性，你既血好冰。 走出你那冷酷、悲慘既宮庭， 打開你心中一扇窗櫺。 揭面紗，快黎睇，睇到佢，你快清醒。 你睇到血，你心應自警。 呢地人都為你，喊冤無人應， 屍骸葬荒岭。 柳兒罪犯哪一條，你讓佢死得不白不明！ 你係個火也難溶既霜冰！
( 隱名王子沖向圖蘭多，揭其面紗。)
圖蘭多：( 威嚴地，唱蝶雙飛 ) 外鄉人，你休斗膽亂性，你企定把話聽。 我唔係凡間女呀，我係上天女兒，自由堅貞。 你雖扯下我面紗，我靈魂卻在天庭。 帝女既門庭，自必凌氣盛，這才不辱公主性。 你休想碰娉婷，惹我怒滿盈。 上天女兒最神聖，任你講乜， 總係我贏！
隱名王子：( 撲向圖蘭多，激情地，白 ) 別忘你身在此徑， 你應該有人性，要懂得愛情。我既生命和愛情，全交俾你來定。我對你痴心一片，我誓要同你把婚盟訂。
圖蘭多：( 急避，唱西岐 ) 唔准你將我欺凌。 哀家唔係你伴影。 你自恃係王子，高傲又任性。 我自問最達賢，最熟女兒經。 潔身自好，獨賞孤影。 唔使你再費心思。省得你費勁。
隱名王子：( 大笑，白 ) 你要把夫郎聘，咁先係真正懂得女兒經。 你唔把我呢個駙馬來認，咁就負了卿卿。啊！我全身好滾燙，我難忍那熔熔情火盛。
( 隱名王子又撲向圖蘭多，意欲擁抱。)
圖蘭多：( 羞怯地急避，白 ) 唔准你褻瀆我，唔准你亂性！
隱名王子：( 直逼圖蘭多，唱長句花下句 ) 共你偕比翼，情火滿胸盈。 姻緣早有三生證，我如今要娶聘婷。 我倆早有協定，你既唔知我既名， 而家天又快光亮，你為我妻今己定。 ( 快中板下句 ) 你既真心非冇情， 你最愛讀女兒經 我要你把夫郎請。 你快打開閨房將我迎。
圖蘭多：( 羞澀又矜持地，唱花下句 ) 陸鈴使我三生不忘，不忘陸鈴受苦刑。 可王子佢愛我我心知。苦煞我唔知點來對應。 ( 禿起南音 )看天上有明月，可我是帝女星。 皇令貼出滿京城。天下男兒黎求聘。 獨有佢破三個謎語。按皇令我應把名份定。 佢唔逼我嫁全係為真情。
( 隱名王子又想擁抱圖蘭多，圖蘭多含羞地急避。)
圖蘭多：( 佯惊恐地，白 ) 唔准你碰我，外鄉人，你冒犯天尊。
隱名王子：( 調笑地，白 ) 我唔係冒犯天尊，我係冒犯嬌妻。 你既吻會使我生命永存。會使你青春常在。
圖蘭多：( 佯怒，白 ) 唔准你褻瀆我！
隱名王子：( 嬉笑著， 白 ) 你係我的！
圖蘭多：( 紅著臉，白 ) 休想佔有我！
( 隱名王子不顧一切地撲向圖蘭多，將她狂熱地擁進懷裡。圖蘭多半推半就。他狂吻著她。)
圖蘭多：( 低聲地， 白 ) 我，我點樣叻。我失敗了。
隱名王子： ( 熱情地，白 ) 你既吻使我生命不息， 我嗅到你的芳馨。 以前， 你唔知愛既甜蜜， 如今， 愛情既光輝伴著陽光上昇。 ( 唱乙反南音序 ) 佢無情卻實多情， 那女兒紅滿腮影， 雙目羞答答， 佢在生愛情。
圖蘭多：(乙反南音上句 ) 我心己醉倒，人還未醒。 墜入愛河心又惊。
隱名王子：( 激情地，白 ) 我喚句好嬌妻！ ( 接唱 ) 情投意合把夫郎認。天已明！ 你講過天明，再查唔到我姓名， ( 正線 ) 你就下嫁俾我，把夫妻名份定。
圖蘭多：( 無奈地，激動地，唱沉腔花下句 ) 哎也也，你挑動我心靈。 ( 禿花 ) 上天點會俾你贏？ 圖蘭多唔准天明！
隱名王子：( 貴妃醉酒 ) 聞到你芳馨，觸你胸襟，我愛撫你不停。 睇嬌你纖纖楚腰在我掌中輕。 你朱唇，給郎一吻，可否賞到愛情？
圖蘭多：( 嬌嫡嫡地，白 ) 我第一次在男人面前流眼淚！
隱名王子：( 扳開圖蘭多，仔細看她，為她拭淚。愛憐地白 ) 你又點啦？ 你喊啦！我既乖乖，你唔好喊啦！
圖蘭多：( 望天長嘆 ) 唉！天哪！ ( 此時天大亮，金光燦燦。) ( 雨打芭蕉 ) 呢一個唔尋常既天明， 圖蘭多睇唔到月亮影， 佢溶化我呢塊霜冰。
隱名王子：( 接唱 ) 全城起來迎天明！ 太陽伴著情愛起升！ 愛情既光輝映黎明！
圖蘭多：( 羞慚地，白 ) 我己失去我既榮譽，我既名聲。
( 後台人聲嘈雜。人們叫喚： “ 圖蘭多公主！” 圖蘭多慌亂地轉身向著隱名王子。隱名王子親熱地迎上去，擁抱她。她把臉藏在他懷裡。)
圖蘭多：( 羞答答地，白 ) 好羞，唔好俾佢地睇見我！
隱名王子：( 愛撫地吻她，白 ) 嬌你唔好怕。 我叫佢地唔睇你羞紅既臉就係叻。你呢張被愛火烘紅既臉，只有我一個人先至有資格睇叻。
圖蘭多：( 嬌澀地，跺腳，白 ) 唔，你好冤氣喇。 人家心惊驚，你就搵人家開心叻！
隱名王子：( 調笑地，白 ) 係咩，咁就該罰叻。 不過唔係在呢個時候，唔係呢度罰。
圖蘭多：( 紅著臉推開他，白 ) 咁又在乜野時候， 係邊度叻？
隱名王子：( 貼在圖蘭多耳邊，白 ) 係那千金一刻， 係你香閨黃錦帳內。
( 圖蘭多飛紅了臉，裝作生氣狀，走開。隱名王子嬉笑著上前拉她。)
隱名王子：( 雨打芭蕉中段 ) 呢個係奇跡奇勝！ 那榮譽，伴你哭聲，反而更有勁。 對我更有魅力，使我更動情！
圖蘭多：( 接唱 ) 當初見你心難靜，心癢癢難平靜。 我那少女心，被你逗得醉不醒。 ( 深情地白 ) 我第一眼睇見你，我就• • • • • •
隱名王子：( 激動地捉住圖蘭多的手，白 ) 就愛上了我。
圖蘭多：( 接唱 ) 為陸鈴報仇，，對求婚男人，我動酷刑。 可我畏懼你。怕你既眼睛。
隱名王子：( 上前摟抱她，親昵地，接唱 ) 我既眼睛係夥星星， 柔光萬道照花徑， 柔情照你香閨庭！
圖蘭多：( 接唱 ) 英雄光輝係你眼睛， 堅定意志充滿心靈！ ( 接唱 ) 這眼神讓我，頓見光明。 我懂得愛情。 勝你，你勝，結局都令人惊。 你醫我心病！ ( 激情地，白 )王子呀，我失敗左啦！呢個失敗，唔係來自那三道謎語，而係來自狂熱。而這狂熱卻來自你！
隱名王子：( 開懷大笑，白 ) 我既好嬌妻，你講到我心甜， 甜到好似泡在蜜糖罌。你知道：有狂熱， 就有愛情。而家你懂得狂熱，你就永遠年輕！ ( 反線千杯酒 ) 佢醉眼滿腮紅，寄我暮暮情。 天應生愛不生恨。 常憐雙燕，雙影分外明。 嬌羞好嫵媚，玉體軟無力， 情愛醉心庭。 華蔻初開芳心顫。 我抱嬌慰嬌，步入風流境。 ( 摟抱圖蘭多，狂熱地吻她。) ( 續唱 )唇香襲我無勁。 這銷魂，心相應。 喜玉女真懂女兒經。 你有情，把婚訂。 比翼偕交頸。 共結鴛侶好姻緣， 三生定！
圖蘭多：( 故作矜持狀，唱花下句 ) 你已勝，你快聽： 帶你既隱名速去莫停！
隱名王子：( 恍然大悟地，白 ) 你捨得趕我走咩?哦！我明啦！ 你生氣，係因你而家未查出我既姓名。我既好卿卿，唔好臨上花轎都唔知夫婿名！
圖蘭多：( 嬌嗔地，白 ) 唔查叻，反正天己大明！
隱名王子： ( 戲弄地，白 ) 你唔怕花轎抬錯到別家門庭！
圖蘭多：( 嬌嗔地，白 ) 你，你好衰架。你唔怕我罰你呢咩?
隱名王子：( 嬉皮笑臉地，半跪狀，白 ) 罰叻，你捨得罰呢咩！ ( 花下句 ) 你若怕我摟抱卿卿， 你若怕我吻不停， 怕惹鶼鰈情有辱娉婷， 我既生死就由你定！( 捉住圖蘭多的手在搖晃。)
圖蘭多：( 假裝威嚴，嬌嗔地，白 ) 你呢個人好冤氣！ ( 扶隱名王子起身。他高興地向她行了個大禮。) ( 中板 ) 羞答答聽佢聲，姻緣已定。 佢唔係狂蜂， 係蝶戀花在傳情。 祖先冤仇難以代代記， 由我呢代開始停。 冤債從此一筆清。 ( 唱花 )我忍不住喜淚滴， 閨閣從此不孤零。
隱名王子：( 作驚訝狀，白 )你唔好喊呀！係唔係我唔講我既姓名， 你受了委屈叻！圖蘭多呀，你聽住黎叻！ 我係鐵木爾之子卡拉夫。
圖蘭多：( 驚喜地，白 ) 卡拉夫！
隱名王子：( 揚州二流 ) 天己明， 喜訊傳宮庭。 鏡花水月應合併。 鶼鰈鴛鴦戲水溟。 婚盟已定喜盈盈。 以愛解仇萬疆定。
( 此時後台響起號角聲。)
圖蘭多：( 欣喜地，唱翠湖春曉 ) 號角聲，響宮庭。 號角響，天己明。 喜時己到姻緣今朝定。
卡拉夫：( 接唱 )獲全勝，喜盈盈。 醉倒春滿亭。 駙馬身份此時定。
圖蘭多：( 激情地拉著卡拉夫，白 )來，卡拉夫，牽我手雙雙上宮庭！
卡拉夫：( 接唱 ) 心飄飄，比翼飛好景。 神蕩蕩， 步上鴛鴦亭。 相親相愛弄雙影， 迎天明。
圖蘭多：( 接唱 ) 比翼雙飛飛不停。 姻緣今日定！
( 幕 下 )
______________________________ 版頭圖片選自京劇版《圖蘭朵公主》
|
|
|||||
