 |
||||||
|
第二場 迎 謎
( 與第一場佈景同。)
( 眾士兵押波斯王子上。)
波斯王子：( 哀傷地，白 ) 龍游淺水遭蝦戲，虎落平陽被犬欺。 ( 拉腔 ) 天哪！ ( 二王 ) 佢把求婚當兒戲，謎語奪去多少命。 佢空有美貌，人像霜雪，冷冰冰。 天下男子冒名來。王位與愛情，究竟誰重誰輕？
平：(白) 我我，位居三品，掌管禮部。我係司徒平。( 望望波斯王子 )！ ( 沉花 ) 唉也也，好一個王子。 (三腳凳 ) 斬頭本理應，誰叫佢係傻子。 唔應有委屈，我地辦事按聖旨。
潘：( 反線中板 ) 唉，我係司徒潘。我辦事冇乜主意。 呢一個失運兒，正引頸待斬。頭將被掛城西鬧市。 講起砍人頭，我全無顧忌，只因我照辦聖旨。
彭：( 走向波斯王子， 白 ) 我係御膳總管，有份主持測試。 ( 反線中板 ) 你係王子，本來王位繼承，先至合你心意。 可你呀， 追個公主， 三道謎語唔會破，真冇意思。 赴情場要喪命， 你將鬧市橫屍。 若論你血統，王室血統金貴，好比金錢財資。 (花)我唔忍心睇你，硬要試火用紙。
(鐵木爾， 柳兒上)
鐵木爾：(南音)僕主相依確係世間稀， 得知我兒還未死， 重遇我兒如見晨曦， 有子送終唔再傷悲。
柳兒：(二王)我地求人憐憫，好比與虎謀皮。
( 一隊行刑劊子手走來，內中有兩人抬一大磨刀石。)
( 人群混亂奔跑，有些人沖向城門，被兵攔住。)
眾人：(大叫)殺頭！殺頭！ 劊子手既好幫手！
( 十二對的劊子手的助手一對對地上場。最前的那對捧著一把亮霍霍的大刀。)
劊子手的助手：( 歇斯底里地叫 ) 磨刀！磨刀！我地快磨刀， 唔管你肥或瘦，“ 喀喳”一聲， 照例砍人頭！
( 眾人爭著上前看刀)
劊子手：( 狂笑地白)有圖蘭多撐腰， 我地幹活從來都係神釆飛揚！
眾人：( 爭著上前， 湧向劊子手 ) 磨刀！磨刀！殺頭！殺頭！快動手！
士兵： ( 大聲罵 ) 狗雜種，滾開！唔准亂動！
( 混亂中有人倒下，鐵木爾被推倒。)
柳兒：( 驚恐地，呼叫 ) 啊！老主人，老主人！ ( 柳兒扶不起他，張目到處求援。) 誰來幫忙！請幫忙！幫我扶起這老翁！
隱名王子：( 在人群中匆匆跑上，扶起鐵木爾。) ( 激動地，白)啊!父王，我地終於相逢！
鐵木爾：( 惊喜地，白 ) 啊！皇兒！ 我地係唔係係夢中？
隱名王子：( 氣憤地，白 ) 果個奪你王位既雜種，正把我追蹤！
鐵木爾：(憂傷地，白 )我到處找你，我以為今世唔會相逢！( 哭狀 )
(眾人圍觀，低聲議論，士兵把他們驅散。三位大臣走近看看他們，後離開。)
隱名王子：( 疑惑地，白 ) 你係邊個？
柳兒：( 謙遜地，白 ) 微不足道。我叫做柳兒，你宮中既一個女奴。
鐵木爾：( 寬慰地，白 ) 我呢一個失去王位既韃靼國國王， 係戰敗時逃走。我聽見有人在我身邊低聲講：“ 跟我來，我給你引路。”一路上，我精疲力竭， 柳兒為我救死扶傷。
隱名王子：( 激動地，白)我十分感謝你。
柳兒：( 謙遜地還禮，白 ) 殿下，唔使多謝。呢地係我應該做既。
隱名王子：( 熱情地，白 ) 你為乜要分擔我地既不幸?
柳兒：( 羞怯地，白 ) 因為有一天，你曾在宮中俾過我一個笑容。
(兩個劊子手的助手抬一大油桶上。)
群眾：( 齊聲白 ) 殺頭，磨刀，殺頭，磨刀！快加油！
抬油桶的：( 白欖 ) 澆些油，再磨刀，磨得神采飛揚。 加油磨！磨快刀，快上殺場！
眾劊子：( 白欖 ) 我地上殺場，殺起頭來喜洋洋。 有圖蘭多作後盾， 殺起頭來喜洋洋！哈哈• • • • • • ( 舉刀大笑)。
隱名王子：( 音樂托白 ) 既係情場，又係殺場，又係墳場！ ( 白頭吟 ) 呢個王子頭， ( 指指波斯王子 ) 雖係高貴卻要頭掛城墻！ 年輕輕兮受情殤，就要枉死殺場。 爹娘在故鄉，佢卻葬在異鄉。 可憐父母心，會為佢哭斷腸。唉，哭斷腸！ (憂傷地，白 ) 唉，我呢一個韃靼王子，命運都唔會比佢好得幾多喇。 ( 接唱 ) 唉故國不堪回首望， 我折翼孤鴻， 難為復國上沙場。 恨奸臣害我父，奪位自為王。 月清風涼飄泊異鄉。 隨流水來覓春色，唔想寂寞凄涼。 離開沙場，再上情場。 (激情地呼喚) 唉，圖蘭多，你呢朵 ( 接唱 ) 帶刺玫瑰， 讓男子，為你情殤！ ( 反線中板 ) 可憐我在逃亡，行到腳發僵。 父子倆好凄涼， 相見在異國他鄉。 我去上前敲大鑼，我變得無比剛強， 駙馬東床，係我既愛情夢想。 ( 二王 ) 好男兒，索謎語生死都不詳。 皇天在上， 求你頒獎。 破謎語我唔再遭殃。
( 走近大鑼，鐵木爾與柳兒上前阻攔。)
鐵木爾：( 焦急地，白 ) 皇兒，唔好去呀！
柳兒：( 哀傷地，白 )主人，為你可憐既父王，你• • • • • •
潘：(威嚴地，白)本司空大臣有令，波斯王子敲鑼索謎， 答唔出三道謎語，處斬!
群眾：( 惋惜地，白 ) 王子美好又莊重，又係一個多情種。
群眾：( 憐憫地，白 ) 佢眼裡有愛情光芒，又有垂死既哀痛。
( 波斯王子茫然地望望在議論的群眾。)
隱名王子：( 憤怒地，白 ) 原諒佢，放開佢，唔好殺佢！
潘：( 故意不理睬，看看天上，此時背景的金黃色漸淡，呈灰白色。) ( 禿頭板眼二流 ) 月亮升起，快上殺場！ 行刑手聽令：手狠心要狼，開大膛取人腸。 我叫眾看客：企遠些唔會把你傷; 我叫士兵：押犯人上堂，送佢多情鬼魂上那溫柔鄉。
(兩個劊子推波斯王子上斷頭台。)
劊子手：( 二流 ) 我地在城牆上， 揮大刀神采飛揚， 砍人頭樂洋洋！
隱名王子：( 憤怒地沖上前，白 ) 慢！住手！寬恕佢！
群眾：( 白 ) 寬恕佢!睇佢年輕又情長。公主你唔好把佢傷。 你為乜唔聽生命在歌唱？ 求你唔好搞到人間咁淒涼。
(此時，一個劊子手把磨好了的刀送給操刀的行刑手，天忽然黑下來。群眾惊恐，士兵催前驅散他們。)
平：( 望天，白 ) 今晚真係奇，月亮為乜唔照殺場？
潘：( 望波斯王子，白 ) 管佢奇唔奇，照例下令開場。
彭：( 揮舞著酒壺，白 ) 開場，開場，我呢個御膳房總管， 就要大豆芽菜炒人腸！
隱名王子：( 小曲雪中燕 ) 夕陽落，下西嶺， 睇那城廓己暝。 夜沉沉晚風吹不停。 好多王子喪了命。 唉，凄清那堪聽。 嘆嫦娥也懂人情， 今晚不露娉婷。 嫦娥怕聞人既血腥； 怕死神既情人睡醒； 怕睇圖蘭多獨自孤清， 深閨伴血影。 ( 反線二王 ) 莫不是駙馬難覓， 因美艷傾天庭？ 莫不是謎底難覓， 天下男兒蠢若豬頭，係白丁。 世人皆說我，聰穎絕頂。 踏那帶刺鴛鴦嶺，把佢冰心來喚醒。 顧不得故國那亡國情； 顧不得我會死去老父就孤零。 ( 音樂過序 ) 愛情催我我有勁， 要同佢把婚盟訂。
( 隱名王子向大鑼走去，柳兒趕忙追上，鐵木爾隨後踉蹌跟上。)
群眾：(大叫 ) 邊個把鑼敲響，公主佢就會到場！ 公主一到場，謎語出三道，死刑跟住上。 我地唔想鑼再響！
平：( 迎著隱名王子惊訝地，白 ) 唉，又一個傻仔，你• • • • • ( 作阻攔狀 ) ( 南音 ) 休往前，把命送。 看那人頭，慘淡容。 可嘆鬼魂，頻喚夢。 情絲卻唔繚金鳳。 呢地鬼魂情深，確係多情種。 可惜心願，付與蒼穹。
鐵木爾：( 接唱 ) 兒念我，父子恩情重， 真係父子肉骨，血緣通。 要惜身價顯耀，不必輕龍種。 你若失誤死去，就把我老命送。
柳兒：( 接唱 ) 我地終日逃亡，無日不惊恐， 異地相逢就似在夢中。 心中暗語，自認係個多情種。 婢女懷春，懷春婢女，身份懸殊，講情無用。 我愛郎情重，只恐水中撈月，一場空。 而佢卻愛公主，注定係命中。 好似龍鳳祥呈，與天共。 ( 走到隱名王子面前，續唱 ) 最怕你敲鑼把謎索，你慘把命送。 身後魂魄，飄泊異域中。 你父王要靠我來侍奉， 可憐主僕一雙，患難相從！
隱名王子：( 接唱 ) 死後人天兩隔，何慘重！ 但愛火燃燒，在我心胸。 玉人不見，我要見花容。 唉情愛重，與佢婚盟共。 願將痴情愛戀，把謎語攻。
柳兒：( 懇求地，白 ) 主人啊，你係一小龍， 要重返皇宮，唔好為孔雀折了大弓。
鐵木爾：( 哀傷地，白 ) 皇兒啊，你要顧我呢一個落難老翁， 冇左你，我一場• • •空。
隱名王子： ( 憂慮地，白 ) 父王，柳兒，我要和公主把婚盟共， 相親相愛共渡秋冬。求你地寬容。 我求求你，柳兒，好好關照我父王， 我把佢交俾你， 由你代我給父王養老送終。
群眾：( 白 ) 情種，懵公，發夢想把謎底猜中，實與死共。 呢對人可能係父子。呢個後生想去敲鑼。 可憐呢個老翁，將要祭兒塚。
(一輪明月冉冉上升，幕上呈銀白色。)
平：( 作吟詩狀 ) 明月出天山，蒼茫雲海間，長風幾萬里，吹度玉門關。
潘：( 揮舞帥旗，白 ) 明月出黎天可鑑，我執行皇令在此間， 唔係心毒唔聽諫，我若反皇令， 我自己就要先入鬼門關。
群眾：( 簇擁而上，白 ) 放左佢，太冇陰功叻！
(眾士兵阻攔人群。)
一士兵：( 喝罵 ) 雜種，滾蛋！
彭：( 白 ) 月亮出黎照天山，照我一身御賜既衣衫。 砍多幾個頭算得乜野，只要我既頭重係處， ( 摸摸後腦勺 ) 不用入鬼門關。
群眾：( 撲向城門口，臉向皇宮，白 )公主，赦免，俾佢赦免。
(城門內人聲鼎沸，人影綽約。燭光影焯。)
隱名王子：( 向城門口高聲白 ) 出黎，冷酷既公主， 你快些出黎!我要當面把你責罰，我要咒罵你太毒辣！
(波斯王子惊訝地看著隱名王子，眾人亦注視隱名王子。全場死寂，只聽見城內迴盪：“ 出黎，冷酷既公主！”)
( 啞場一陣，所有人都望那拱門。只見宮燈掩映。有裙裾窸窸聲和腳步聲。)
公主：( 從城門內邊唱邊上，唱送子排子。) 皎月照我閨房， 叫喚聲聲沿宮墻上。 聽佢聲音帶磁，幾咁昂揚。 夠大膽，喚哀家落了床，夜出城墻。
侍女：( 手持宮燈，白 ) 圖蘭多公主，小心叻！
群眾：( 撲至宮墻，大叫。) 圖蘭多公主，赦免，赦免！
( 圖蘭多出場，在她週圍放著金光。除波斯王子、隱名王子站著之外，眾人拜倒。圖蘭多望望隱名王子，似有所觸，心為之一動。她輕蔑地望望波斯王子，迅速地把手一揚，示意劊子手行刑。隨後，公主一行人離去。)
波斯王子：(自始至終凝望著公主站立處，白 ) 啊！我心中既女神！ 得見你芳容，我死都眼閉啦！
眾人：( 紛紛站起，向著公主背影，白 ) 公主殿下，赦免，赦免！
( 一白衣祭司出場，走向波斯王子。)
白衣祭司：( 白 ) 奉公主口諭：行刑！ ( 面向波斯王子，作向天禱告狀。) 偉大既孔子，願你保佑呢個垂死既靈魂上天！
(白衣祭司領頭走，眾劊子手推波斯王子走下。台上一片昏暗，只剩下隱名王子、鐵木爾、柳兒。隱名王子向著公主離去的方向呆立。鐵木爾憂慮地走向兒子，搖搖他。)
鐵木爾：( 惊愕地，白 ) 皇兒，你• • • • • •
隱名王子：( 望著公主離去的方向，激情地，白 ) 惊人既美麗， 我既心己俾佢奪去! ( 接唱送子排子 ) 奇香，奇葩好香， 迷人秋波，回眸一望，使我發狂。 玉人遠去留芬芳。我誓要摟你雙雙上東床。
鐵木爾：( 白 ) 皇兒，你俾佢迷住叻!你快些離開，唔好胡思亂想。
隱名王子：( 唱老鼠尾 ) 佢美艷，惊月光， 萬顆明珠因佢會變黃。 我蟾宮折桂唔怕走近黃泉上 與佢合巹交杯醉倒夢鄉。 我敲鑼索謎方， 唔怕失敗把我名記在靈牌上， 我要為愛而亡。 (深情地白)為佢死我也值得叻！
鐵木爾：( 憂慮地，白 ) 皇兒呀，你為佢死，唔值得叻！ 他朝一日，殺回韃靼去，果陣時，你就係九五之尊叻！ ( 乙反長二王)同舟共濟父子倆，
柳兒：( 接唱 ) 王子心中有嬌娘。
鐵木爾：( 接唱 ) 如此斷腸在異鄉，
柳兒：( 接唱 ) 惊恐彷徨好凄涼。
鐵木爾：( 哀怨地，白 ) 皇兒呀！你忍心丟下我，我就會 (接唱)孤苦零仃變魍魎，可憐父子倆。
柳兒：( 接唱 ) 佢發狂我心傷，我怕佢鐵石心腸。
隱名王子：( 憂慮地，白 ) 柳兒呀! ( 唱序 ) 我若死左，老父交你相扶將，你一片忠心我知詳。
柳兒：( 接唱 ) 佢唔知我心，一片痴情正彷徨。
隱名王子：( 激動地，白 ) 父王呀! ( 接唱 ) 你皇兒聰穎賽智囊，會把那東床上。
柳兒：( 白 ) 唉！( 唱正線二王 ) 王子啊，你為佢發狂。
鐵木爾：( 接唱 ) 你真使我失望，為那公主把命傷。
隱名王子：( 接唱 ) 快為我設新房，我定取勝情場。 (白)我既心早俾佢奪去，我唔怕那三道謎語， 我要把求婚滋味好好嘗。
( 又欲上前敲鑼。)
鐵木爾：( 上前拉住其子，險些跌倒。) ( 白 ) 皇兒呀，離開呢度，你先至有命，有命， 先至講得上配鴛鴦。
隱名王子：( 堅決地，白 ) 我邊度都唔去， 我既生命就在呢度!噢!圖蘭多在我心上。
(與此同時，幕後波斯王子亦叫 “ 圖蘭多！ ”繼而一聲尖叫。台上三人惊恐地望望後台。)
鐵木爾：( 惊恐地，白 ) 皇兒呀，你要敲鑼， 就會像呢個波斯王子咁樣死去！
柳兒：( 慌亂地，白 ) 殿下，趕快離開呢度，先至有活命。
隱名王子：( 舉手向天，呼叫 ) 上天保佑，我會光榮地征服佢， 同埋征服佢既美麗！
( 幕下 )
______________________________ 版頭圖片選自京劇版《圖蘭朵公主》
|
|
|||||
