第七場
尾
聲
( 宮外,玫瑰色的曙光反射著,色彩斑斕。皇帝被大臣和士兵簇擁著, 坐在高階梯頂上的平台上。人群在廣場兩邊,成半圓形地站著。卡拉夫和鐵木爾在人群後面。)
眾人:( 伏地行大禮,高呼 )
吾皇萬歲萬歲萬萬歲!
皇帝:( 白 ) 平身。
眾人:( 起立,齊呼 ) 謝皇上。
皇帝:(
嚴肅地,白 ) 天己明,果個外鄉人既姓名,
你地大家係唔係都己查明?
( 眾人面面相覷,台上一片寂然。)
官員:( 白 )啟稟聖上,公主令下,全城徹夜不眠,
個個都碌大雙眼在查;個個都扯長雙耳在聽,都唔知佢姓名。陛下令我地連夜查閱全世界既姓氏• • • • • •
皇帝:(
莊重地,白 ) 查得又點樣?
官員:( 白 )
啟稟聖上,出動所有大學士,都無法查明!
皇帝:( 憂慮地,白 ) 皇兒!
圖蘭多:( 白 )父王,皇兒在。
皇帝:(
發現公主滿臉有春色,便裝作不解地,白 )
而家點樣做先至好呢?
圖蘭多:( 忸怩地,白 ) 父王,咁• • • •
• •
皇帝:(
似有所悟地仔細看了她一眼,捋捋髭鬚,假裝作怒,白 )
係唔係將佢殺!
圖蘭多:( 著急地,白 ) 父王,這• • • •
• •
皇帝:( 故意地,白 ) 眾人,將外鄉人拿下!
( 士兵欲綁卡拉夫。)
圖蘭多:( 喝士兵 ) 畜牲,住手!
( 士兵望望皇帝,又望望公主。不知所措。)
皇帝:( 故作不解狀,白 )
皇兒,你咁樣,係唔係• • • • • •
(
圖蘭多踏上金色的鋪氈,走近皇座。卡拉夫深情地目送著她。平留心地觀察他倆。)
圖蘭多:( 嬌羞地,白 ) 父王,我• • • •
• •
皇帝:(
故作不解,白)皇兒,你又想點叻?
圖蘭多:( 驕傲地,白 )
父王,我知道佢既姓名啦!
皇帝:( 嚴肅地,白 )
哦!按你地兩人既協定,你知道佢既姓名,
就要收佢既命!眾人,快給我拿下!
(
皇帝威嚴地指著卡拉夫,眾人撲上去擒卡拉夫。場上打鬥,亂作一團。)
圖蘭多:( 焦急地在跺腳,白 ) 父王• • •
• • •
( 皇帝故意不理會,掉頭他顧。卡拉夫被拿下。)
圖蘭多:( 氣憤地向著士兵,大叫 )
畜牲,住手!放開佢!
( 士兵惶惶不知措。)
平:( 上前拉開士兵,放開卡拉夫。唱翠裙腰 )
真係秀才遇著兵,
有道理,講都講唔清。
你唔會觀顏又睇景,
睇公主紅暈滿腮一臉情。
潘:( 接唱 ) 佢地只係兵丁,
一味只知服從命令。
又點會跑去睇景。
木轆一個唔知人情。
( 白)
佢地更無法懂那風月情,何況圖蘭多陰陽唔定,佢既臉時陰時晴。
彭:( 接唱 ) 佢話裡另有聲,
畫裡另有景。
風林打葉, 你仔細聽聽。
( 白 )咦,聲外更有聲。呃,此時無聲勝有聲!
( 接唱 ) 扯長耳再聽,
似月皎烏啼靜,
老鼠見貓好惊。
但望佢,( 仔細望著公主 )
臉上殺氣無蹟,似有紅霞映。
唉!我真懵星星!( 打自己的後腦勺 )。
平:( 接唱 )抬棺材或花轎,你地心要清。
( 拉潘走上前,接唱 )
我地使上食奶力,花轎上庭!
彭:(
從後追上,白 ) 咁我呢,我要唔要抬副棺材跟住尾?
平:( 笑,白 ) 你快去收檔!
官員:(
搖搖頭,白 ) 你地三個在呢度發乜野翕風?
潘:( 詭詐地,接唱 )
天機唔准泄漏,你等一下豎起耳仔听!
( 滑稽地,白 ) 不過,我地大智不愚,施計不停。
皇帝:( 接唱 )
皇兒令朕,左右為難,你趕快將主意拿定!
圖蘭多:( 白 ) 我知道佢既姓名。
皇帝:( 白 ) <百家姓>中姓王抑或姓丁?
圖蘭多:( 白 ) <百家姓> 中冇佢既姓。
皇帝:( 惊詫地,白 ) 唔要緊架,朕下令叫人找找
<千家姓>、<萬家姓>。
圖蘭多:( 撒嬌地,白 ) <千家姓><萬家姓>
都冇呢個姓。
皇帝:( 慈祥地笑,白 )
中國冇,其它國可能有架。
圖蘭多:( 嬉笑著,白 )
我相信其它國亦唔會有唧!
皇帝:( 歡喜地,白 ) 咁又有乜要緊喇。
朕叫人把佢既姓氏編入 <百家姓> 中就係叻!
圖蘭多:( 高興地,白 ) 謝父王。
皇帝:( 焦急地,白 )
皇兒,趕快道來。
圖蘭多:( 興奮地,白 ) 父王,佢既姓名就叫做
“ 愛情!”
皇帝:( 先惊,後大笑 ) 哈哈• • • • •
• 好!
哈哈• • • • • “ 愛情! ”
( 在場眾人歡欣雀躍。)
圖蘭多:(
嬌滴滴地,白 ) 咁,父王,
你重編唔編呢個姓氏入
<百家姓> 呀?
皇帝:( 捋捋髭鬚,沉吟一下,白 )
編!朕金口一開,駟馬難追!
只要皇兒你高興,朕就下令把呢個“
愛情”編入<百家姓>中。哈哈• • • • • •
(
忽然把臉一沉,白 ) 既然你知道佢既姓名,你唔係話過要收佢既命?
(
向階下一揮手,示意士兵拿下卡拉夫。眾士兵正欲沖向卡拉夫,被三大臣擋住。 鐵木爾焦急地望著這一切,不解地看著兒子向他投來的笑容。)
圖蘭多:( 撒嬌地,白 ) 父王,我• • • •
• •
皇帝:(
故作矜持狀,白 ) 你又點啦?
圖蘭多:( 害羞地,白 )
父王,係佢自己將佢既姓名同我講!
皇帝:( 故意裝腔作勢地,白 )
唔管你邊個講,反正你地講過,
你知道佢既姓名,佢就冇命。
圖蘭多:( 忸怩地,白 )
但係,佢講姓名既時候,己經係• • • • •
皇帝:( 裝作吃驚,白 ) 係夜晚黑。
圖蘭多:( 撒嬌地,白 ) 父王,唔係• • •
• • • 唔係• • • • •
皇帝:(
故作威嚴地,白 ) 快快稟來,係乜野時候?
圖蘭多:( 忸怩地,白 ) 係黎明之• • • •
• • 之• • • • • •
皇帝:(
故意打斷,白 ) 黎明之前?
圖蘭多:( 嬌羞地,白 ) 父王,係黎明之• •
• • • •
之• • • • • • 後• • • • • •
叻。
皇帝:( 故作無奈狀,白 ) 咁你唔想嫁也要嫁叻。
圖蘭多:( 莊重地,白 )
父王,係既,呢個係神聖既誓言。
皇帝:(
故作不解狀,白 ) 乜話?又係神聖既誓言?皇兒,
你唔係講過,冇誓言係神聖,只有圖蘭多先至係神聖既咩?
圖蘭多:( 撒嬌地,白 )
唔製架,父王,你點解篤我既背脊叻。
皇帝:( 故作恍然大悟狀,白 ) 哦,朕明叻。係唔係今時又唔同往日啦?
圖蘭多:( 矜持狀,白 )
父王,咁又係既。父王,你睇下• • • • • •
皇帝:(
不解狀,白 ) 皇兒,又睇乜野叻?
圖蘭多:( 指指宮闈,唱春江花月夜 )
紅日高照城頭,
喜看那珠欄玉砌金光透。
人間春色滿閣樓,滿庭皆錦繡。
我未飲春酒,唔知愛情勝過金鉤。
今天飲左,香醇甜透,又醉心頭。
呢杯情酒暗香滿喉。
皇帝:( 欣慰地笑,接唱 )
朕講皇兒,你為女中首。
懷春少女都一樣,春汗濕透。
你身上冰雪解,我國就安寧不用愁。
(
熱情地,白 ) 過來,外鄉人,你既名字真係叫做“ 愛情?”
( 卡拉夫笑著望望公主,公主含羞地低頭。)
卡拉夫:( 激情地,白 )
聖明既天子,我既姓名係---“ 卡拉夫!”
皇帝:( 高興地,白 )
哦,卡拉夫,你係朕既半子,係當朝既駙馬爺!
卡拉夫:( 激動地伏地拜,白 )
父王萬歲萬歲萬萬歲!
眾人:( 歡天喜地地伏拜,齊呼 )
吾皇萬歲萬歲萬萬歲!
鐵木爾:( 在人群中歡慰地,白 )
我兒保得條命又當駙馬,
日後復國有望叻!
皇帝:( 接唱 ) 帝女加半子,朕喜上心頭。
今晚完婚。謝你用愛來化解百年仇。
俾佢知道,海棠雖依舊,但會綠肥紅瘦。
花自飄水自流,不惜春,紅顏會變白首。
你地速完婚,朕再不用愁。
咁鮮血不再流,從此共享昇平喜笛奏!
卡拉夫:( 牽公主的手,接唱 )
我係年少好風流,快讓我上你既閣樓。
圖蘭多:( 害羞狀,接唱 )
佢心急往鵲橋走,
忘了拜堂喜笛奏,
拜左堂才上鳳樓。
官員:( 白 ) 聖上有旨:奏喜笛,擺喜酒!
平:( 手忙腳亂地,白 )
快奏喜笛,快擺喜酒!快抬花轎走在最前頭!
彭:( 白 )
未見過,一時講唔嫁,又要殺男人既頭;一時又要嫁,
急到冇尾又冇頭。
潘:( 白 )
老兄,你錯怪公主叻。唔係佢急,係果個駙馬爺急喳嘛。
彭:( 白 )
哦,原來係駙爺急唧,咁還講得過去叻。
我地大家都係男人,講起要枕個鴛鴦枕頭,唔急先至怪呢。心痒痒邊個都係咁既,我地唔好多追究。
平:( 白 ) 你又發乜野翕風呀!
潘:( 白 )
狗咀生不出象牙。唔好係度嘈生晒,快抬花轎飲喜酒!
眾人:( 歡叫 ) 快抬花轎飲喜酒!
卡拉夫:( 楊翠喜 )
這是幸福俾愛情既報酬;
愛情給光明作謀。
睇佢春色映臉紅艷透。
我醉倒裙下享溫柔。
( 深情地望著公主,白 ) 我心急得難等候。
圖蘭多:( 接唱 ) 舊既圖蘭多己遠走。
新既圖蘭多,正在等候。
等候宮庭設喜筵鬧酒!聽喜笛奏。
合巹交杯享盡人間樂,樂夠。
相親相愛喜悠悠。
卡拉夫:( 接唱 ) 嬌妻,嬌妻呀天地會佑,
保佑我地同偕白首。
妻你喝酒便有醉眸。
快快快趕上鳳樓。
圖蘭多:( 接唱 ) 合巹酒湧上喉。
與君一醉共臥鵲橋頭。
一盃醇酒,可解百年愁。
卡拉夫:( 接唱 ) 少年風流好消受。
拉起嬌妻玉手,
步向東床樂悠悠!
( 倆人依偎,緩緩步入後台。)
彭:( 扯住平,神詭地,白 ) 果副• • • •
• •
平:( 疑惑地,白 ) 喂,你唔係跟埋佢(
指指公主背影 ) 一齊轉性喇。
幾時學會扭扭擰擰好滑頭!
彭:(
扯住平的耳朵,白 ) 果副四塊半點辦?
平:(
推開彭,大叫 ) 乜野四塊半呀?
彭:( 用手示意,白 ) 就係副棺材。
平:( 生氣地,白 ) 呸!而家係乜野時候!
彭:( 不服氣地,白 ) 你唔講我又點知道火候!
平:( 瞪了彭一眼,白 ) 你真係蠢到不如豬頭!
彭:( 爭辯地,白 ) 你唔係話過等你下命令既咩!
潘:(
譏笑著,白)真係人蠢冇藥醫!你真係蠢過阿斗!
平:( 拉住彭,白 )
我籌先唔係下令叫你去飲喜酒既咩。
你為乜唔快些走!
彭:( 垂涎欲滴,白 ) 有得飲耿係去飲喇。
好過我平日在御膳房偷偷飲又怕人咒。
潘:( 白 ) 啍!不打自招!你等住挨揍!
彭:( 不服氣地,白 )
呢叫做近官得力,近廚得食嘛!
喂,平大人,你還未講清楚。等陣俾果對新人,睇見副棺材,我就保唔住我既頭。
平:( 笑笑,白 )
你放心,圖蘭多而家唔會亂殺人,
佢而家只一味想,點樣趕快學會在芙蓉帳里,獻溫柔。哈哈• • • • • •
( 三大臣在大笑。)
彭:(
猶疑地,白 ) 咁果副棺材,係唔係就擺在城頭?
平:( 生氣地吐了一口唾沬,白 )
呸!大吉利事!埋在地裡頭!
彭:( 不解地,白 )
咁係副空棺材,而且又係大紅棺木塗過桐油。
平:( 決然地,白 ) 空唔空都要埋入地,不過•
• • • • •
彭:(
驚詫地,白 ) 又點叻?
平:( 詭詐地,白 )
如果你厭佢空,你可以睡在裡頭好享受。
彭:( 搶白地,白 ) 呸,大吉利事冇你收!
潘:( 嬉笑著,白 )
如果你唔抵得佢靚,你幹脆就把佢放在床頭。
彭:( 向地上吐了一口唾沫,白 )
呸,大吉利事!快搬走!
( 拉住平和潘的手,白 )
而家輪到我呢個御膳房總管發號施令叻。你地兩位大人唔好在呢度搵我笨。黎喇,錯過喜筵,在呢度打牙教,先至係蠢過豬頭。
( 高興地在台上揮舞手足,白 )
我,御膳房總管,而家英雄有用武之地叻。我但願天天能設筵飲喜酒。
潘:( 歡喜地,白 )
會叻。圖蘭多轉左性,我就可以搞我既本行,
大興土木建閣樓。
平:( 高興地,白 ) 我又可以捧回我既文房四寶。
去去去,為太平盛世,飲勝酒!
( 後台喜笛高奏,卡拉夫和圖蘭多穿大紅喜服上。)
官員:( 白 )聖上有旨:全城歡宴,
慶賀圖蘭多公主與卡拉夫駙馬爺完婚!
( 眾人紛紛湧上場,歡呼: “
吾皇萬歲萬歲萬萬歲!” “ 恭喜公主,賀喜公主!”)
官員:( 白 ) 聖上有旨:親家爺鐵木爾,賜上座!
鐵木爾:( 向皇上作揖,白 ) 謝皇上!
( 官員侍候鐵木爾上座,皇帝示意他坐下。)
官員:( 白 ) 公主大婚開始!
( 此時喜樂大奏,一對新人走到台的正中央。)
( 高呼 )
一,拜天地;二,拜祖先;三,夫妻互拜。
皇帝:( 笑吟吟地,白 ) 從此大家安享太平!
眾人:( 歡呼 ) 恭喜公主!恭喜駙馬爺!
( 圖蘭多與卡拉夫摟抱著,向眾人揮手致謝。)
( 幕 下 。 劇 終 )
______________________________
版頭圖片選自京劇版《圖蘭朵公主》