太平山下（一）

太平山下太離奇。所謂天堂幾咁悲。
滾紅滾綠寃鬼鑿；車三車四令人疑。
金魚缸惹一身蟻；白鴿籠懸萬國旗。
有頸任箍揸夾頂，碰埋好似線都黐。

太平山下（二）

太平山下好烏龍。路上週時掘滿窿。
無理加租心翳翳，有人減價口空空。
走頭不少硫磺馬；洗眼何多垃圾蟲？
講起治安標冷汗，唔聞例劫當奇逢。

太平山下（三）

太平山下幾糊塗。男女嬲親亂掟煲。
小姐未婚先大肚；後生唔老竟留鬚。
埋牙開片心都震；出面收規膽夠粗。
音響滿街真吵耳，從朝到晚似墟嘈。

太平山下（四）

太平山下至麻煩。説話唐家混老番。
炒票黃牛得米路；抄牌白蟮上沙灘。
阻差有難捱成日；走鬼無非博兩餐。
報紙攤開真攞膽，強姦強搶好多單。

太平山下（五）

太平山下確荒唐。錢少錢多都要慌。
搵食地頭常過界；藏春架步早成行。
開心六合無端中；搶眼三圍有偽裝。
撈蛋客家都發曬，誰憐八口一張床？

太平山下（六）

太平山下好牙烟。十個行埋九為錢。
欠債不還財亂度；殺人唔使命來填。
當堂指鼻稱䭾地；開檔擔心要睇天。
塘水滚塘魚亦苦，幾多啞仔食黃連。

太平山下 （七）

太平山下好兒嬉。正話聯婚又話離。
擺大個頭充闊佬；揸埋條頸避衰飛。
認親認戚唔知醜；疑鬼疑神點算奇。
口口聲聲捱義氣，信他顧住枕筲箕。

太平山下 （八）

太平山下好哩啦。你拆蟹時我炒蝦。
相識講心心會變；提防揸手手來扒。
個頭剪綵纔開幕；轉眼清盤又話瓜。
點得人人都飽暖，四圍寧舍見繁華。

太平山下 (九）

太平山下得人驚。物價狂加冇樣平。
有陣行街頭岳岳；無端瀨野面青青。
劏牛不死真稱幸；賭馬如痴似實贏。
造乜高空拋廢物，點都總係勸唔聽。

太平山下 (十）

太平山下夠繁榮。冇計之人冇得傾。
馬路專通通不易; 銀行任數數唔清。
撈粗野讚真威水；搵少錢嫌太濕星。
咪笑中心名咁怪，無城道道反稱城。

太平山下 (十一）

太平山下好齊全。淨係頭分綽枕拳。
金鼓交鳴心盡郁；雌雄莫辨肉都酸。
膏搽面懵難遮醜；尺度胸圍易識穿。
有陣得閒遊吓埠，應防搵笨旅行團。