雀局吟(一)


四人約好就開牌。五個輪流懵亦佳。
作局有心求耍樂;衰家激氣至難捱。
生張扣實誇高手;番字收埋當大齋。
未到完場輸未定。起圏執位再安排。

雀局吟(二)


三雞等一確囉欒。夠脚行埋玩幾圈。
怕食頭糊唔老利;講來手氣最週全。
博生扣死心神報;換櫈移燈眼鬼冤。
雙辣自摩贏到笑,收場重噍大三元。

雀局吟 (三)


做牌往往夢成空。最忌冤家化骨龍。
擲色旺衰如有定;偷張靈活變無窮。
要疴假尿唔慌叻;想打真軍咪放鬆。
輸左自然牙較甩,截糊搶降冇陰功。

雀局吟 (四)


分明塘水滚塘魚。有陣贏時有陣輸。
叫碰點能唔係碰;話誅未必係真誅。
局中抽水非常易;降上開花確特殊。
至怕旁觀加把咀,風聲洩漏恨何如。

雀局吟 (五)


東南西北別門風。次序千祈咪亂籠。
過洞分明唔係棧;稔庄當旺點能鬆。
滿糊食出誇行運;雙辣輸埋話反攻。
有陣至衰包到正,一聲啱曬面燶燶。

雀局吟 (六)


詐糊雖則係無心。照例通賠至得霖。
單叫難求真肉緊;幾飛易撞咪喉擒。
來頭夠大三家震;摸手唔靈一定沉。
最怕人譏觀世世,四圏盲門冇厘音。

雀局吟 (七)


食到天糊夠大劑。十三么怕摸唔齊。
雙番東似爭衝綫;單吊西都望解圍。
陣陣開頭多認叻;場場損手不消提。
九張落地風聲緊,總係擔心遇着雞。

雀局吟(八)


打花漏摸好麻煩。後補先擰咪話閒。
顧住下家撈剩水;至驚人地把頭關。
卡窿望上唔容易;獨聽摩埋冇得彈。
遇着大牌雞亦噍;搶糊密食當三番。

雀局吟(九)


打牌㸃可打天光。攞苦來辛不上床。
成晚連場真霎戆;通宵作局太荒唐。
爆棚認叻誇威水;執位嫌輸起過庄。
深夜擾人唔係路,若然拉去罰當堂。

雀局吟(十)


碰齊中發勢如狂。白板難鬆够你慌。
上馬失威頭擰擰;走雞唔叫眼光光。
絶張食出真行運;降尾拿來豈靠裝。
打醒精神防大牌,幾時至得望摩黄。